على خاطرهم هما الكبار و نحن الصغار يلزمهم هما يحكوا و نحن نسمعوا
على خاطرهم هما الكبار و نحن الصغار يلزمهم هما يعيطوا و نحن نسكتوا
على خاطرهم هما الكبار و نحن الصغار يلزمهم هما يقرروا و نحن نوافقوا
على خاطرهم هما الكبار و نحن الصغار يلزمهم هما يغلطوا و نحن اللي نتعاقبوا ، هما اللي يأمروا و نحن اللي نفذوا ، هما اللي يربحوا و نحن اللي نخسروا ، كان هما خرجوا على الخط حاجة عادية و كان نحن خممنا نخرجوا على الخط تقيم القيامة
على خاطر نحن الصغار لازم يحصرونا ، يحطمونا ، يقتلوا الحلم اللي فينا ، يقتلوا فرحتنا و حكايتنا ، يغتصبوا الحاجة الباهية اللي فينا و يعاقبوها و يشنقوها و يزيدوا يلونوها و باللون الاسود زادا ، يلوثوها و يحرقوها و يمرمدوها
يشدوا حلمنا اللي طاير في السماء السابعة يهبطوه على خاتر حرام يطير و يوصل للبلايص هذيكا متع العباد النظاف ، لعباد اللي تصلي و تصوم و تمشي للجامع و نحن حلمنا 'مسخ' موش كيف ما يحبوه هما ، موش كيما التصويرة اللي رسموها هما ، على خاطر حلمنا موش حلمهم موش هما اللي رسموه و زينوه . على خاطر حلمنا نحن موش هما
على خاطرنا نحن الصغار و هما الكبار يصير فينا و يمرمدونا و يمسحوا بينا الوسخ اللي عملوه هما
على خاطر نحن نرقصوا و هما ما يرقصوش
على خاطر نحن نحبوا و هما مايحبوش
على خاطر نحن الجنة و هما النار
على خاطر هما دنيتهم ظلام و حزن و نحن تخلقنا نضحكوا و منورين
على خاطر هما ماشي في بالهم اللي هما الكبار و يحقلهم اللي ما يحقلناش ، على خاطر حلال عليهم و حرام علينا
Aucun commentaire:
Enregistrer un commentaire