على خاطرك قوي

كي تتقهر من روحك خاطرك ضعفت ، تبدلت و خفت ... خاطر خليتهم يسرقوك ، يهزوك و يضيعوك في عالم انت موش قده ... كي تشتهي مرة ترقد مرتاح منغير ماتخمم فيهم ، منغير متحاسب روحك على كلمة قلتها وجعتهم ... كي تلقاهم هما موش مقلقلهم انت ، موش مقلقهم تبكي والا لا ، موش مقلقهم تسهر على خارطهم والا لا ... كي تلقى روحك تحبهم و هما زادا يحبوا رواحهم ... كي تلقى روحك لازمك تبعد و انت عمالك و تقرب ... كي تلقى روحك ساعة ساعة تضعف اما تلقى هاكي شوية القوة اللي فيك متخبية فيك و كل مرة تطل عليك و تقولك متخافش هاني معاك ، تقلك راهم حبوا يقتلوني اما راني قوية و مانموتش و باقية معاك و بش نرجعلك ماتخافش راني منسلمش فيك ، تقلك راني نؤمن بك و آمن انت بروحك راك متضعفش و متتعبش و حتى كان تعثرت و طحت بش توقف و بش تتعدى و تخليهم يتحسروا عليك و يحسوا بقيمتك ... كي تلقى روحك قوي وقتها تهز راسك ، تمسح دموعك و تضحك

كي يحبوا يحطموك ، يدمروك و يقتلوك بكلامهم ، كي يوجعك كلامهم و تلقى روحك تبات ساهر اليل على خاطرك موجوع ... كي تلقاهم طايرين وراء احلامك بش يشدوها و يرجعوها للارض بالسيف و مايخلوهاش توصل للسماء الثامنة و التاسعة و كان لزم العاشرة - على خاطر في قاموسك فما اكثر من سماء السابعة- ، كي يحبوك تمشي وراهم على خطهم اللي رسموه ، في الثنية اللي عملوها ، في زناقيهم الضيقة المظلمة اللي تخنق ، كي تلقى روحك ماشي وراهم و انت ساكت تتذكر روحك اللي انت قوي تخطف الدورة و ترجع تجري مفجوع شبيك ماشي وراهم ؟ علاش تبعتهم ؟ علاش ماكنتش انت ؟ تخاف من الوقت اللي بش تضيعه و انت راجع ، تخاف من زناقيهم الموحشة اللي بش ترجعها وحدك ... اما تقول ميسالش محسوب انا قوي و بش نرجع و منكون كان انا وقتها تهز راسك و تضحك

كي تلقاهم يتحكمولك في الكبيرة و الصغيرة ، في كلامك و سكوتك ، في مشيتك و وقفتك و كان لزم في الهواء اللي تتنفسه ... كي ميخلوكش تعلي صوتك و تغني ، تسيب بدنك و ترقص ، تحس و تمثل والا توصل فكرة والا تقول كلمة والا تمد يدك و تعاون ... وقتها تعاود تتذكر اللي انت قوي و موش بش ينجموا يوقفوك والا يبعدوك على ثنيتك .. حتى لو كان خسرتهم عادي

 تخسرهم ولا تخسر روحك