المرأة التونسية

للمرأة التونسية دور هام جدا في تاريخ تونس ، عليسة ، كاهنة البربرية ، جازية الهلالية ، مية الجريبي ، راضية النصراوي  ... و برزت خاصة قوة المرأة التونسية في الثورة التي اثبتت جدارتها بانها مساوية للرجل ... حيث كانت دائما في الصفوف الامامية من ايام الاستعمار الفرنسي ، حكم بورقيبة ، حكم بن علي الى حد الآن فهي مازالت تسجل حظورها البارز في كل المناسبات ... كما انها تحقق نجاحا يشهد به في المجال العلمي 

سيدتي ، في عيدك اريد ان اعبر عن مدى سعادتي بانني تونسية .. اتشرف بانتمائي لمراة قوية ، متمردة ، ناجحة 

سيدتي ، ارفعي راسك و اعتزي بنفسك فالتاريخ يشهد بك ، دافعي عن حقك و قاومي ، تمردي و اصرخي لا احد يستطيع سحب حقوقك منك ، لا احد يستطيع لهيب ثورتك ، لا احد يستطيع اخماد صوتك ... لا احد يستطيع تحديك 

كوني انتي ، كوني تونسية 

نساء بلادي احبكن ، كما لم يحبكن احد ، صباحا مساء و يوم الاحد

انتن فخر تونس و زينتها 

-----------------------------------------------------------------------------

المرأة التونسية زينت تونس و نوارتها ، تاج مرصع على راسها من الفوق ، قدرها عالي و غالي ، مزيانة بضحكتها و ثقافتها و لبستها ، ترفع الراس و هي الاساس ، في كل ثنية تلقاها مبهيتها و مزيتنها ، في كل مدرسة و معهد و الجامعة تلقاها معبيتها و لنجاحها سابقتهم ، قرايتها و خدمتها و مستقبلها على راسها من الفوق ، ملي تولدت فهموها اللي هي زينة الدار و البلاد .... في قديم الزمان جاء شكون كتب عليها كتاب حب ينورها و يحررها خاطر عرف قيمتها ، عرف اللي تونس زينتها هذيكا الطفلة الصغيرة المزيانة و بعده جاء شكون عمللها مجلة لمدلها فيها حقوقها ، و كل ما الطفلة الصغيرة تكبر تزيد تتاكد و تاكد اللي هي قدها و قدود و بينت اللي هي قوية و ذكية 

من هذاكا الزمان و المرأة تونسية تمشي لقدام و كل ماتتلفت وراها تلقى تاريخ حافل لها تزيد تهز راسها و ترفعوا و تقدم 

المراة التونسية ، الطبيبة ، الاستاذة ، المحامية ، اللي تخدم في المعامل ، اللي تنظف و اللي تغسل ، اللي تخدم في الفلاحة ، الصحافية ، المخرجة ، الموسيقية .. المرأة التونسية المقدية ، هذيكا اللي ضحكتها و بسمتها تزيد في عمر تونس نهار ، هذيكا المرأة المعرسة ، المطلقة ، اللي لتوا لا لقات ولد لحلال ، الصغيرة و الصبية ... المرأة التونسية : هي ، انتي و انا ، امي و امك و جارتنا اللي تنسنس على الماشي و الجاي 

 ارفعي راسك و امشي و قدم و مايهمك في كلامهم ، خلي يقولوا و يعملوا اللي يحبوا ما تكوني كان انتي ، ما تكوني كان تونسية