حالتنا متعبة

حالتنا متعبة كل نهار نزيد نتاكد اللي حالتنا اتعب من النهار اللي قبله  . امورنا معادش تعجب من الفقر للجوع للعباد اللي تتعارك على الاعانات شي يوجع القلب و يخليك تبهت و تقول عنا في تونس هكا ؟ ياخي وصلنا للدرجة هذي في تونس عباد موش لاقية علاش تحط راسها و ترقد كي خلق ربي الكل ... و اللي يوجعك اكثر احساسك بالعجز و تولي تتمنى في اللي تبدى عندك قدرة خارقة تبدل كل شي و اللي يبات الليل  و هو يخمم في فيديوا تونسي ولد بلاده مقتول و يقطعوا في جثته في سوريا و اللي يركبه الدم كي يشوف في برشا واحدين يشجعوا في العباد بش تمشي لسوريا و اللي يعصر عليه قلبه كي يشوف ام محروقة على ولدها اللي ضاع في البحر عمل حلمة و صدقها و حب البحر يوصله ليها ياخي بلعوا ،  و اللي ولدها ضاع في سوريا ماشي يحلم بالحواري و الجنة و تلقاه يقتل في انسان لا يعرفه و لا شي و يتم عائلات و شردهم على خاتر حلمة لعبتله بمخه و بحياته لا خمم في امه و لا زوجته و لا حد من اللي يحبوه و اللي حياتهم مربوطة بيه ، ناسين اللي الولدين قبل كل شي و اللي خرجت فرحانة بروحها بش تولي ام تلقى روحها مابين ايدين اللي ميرحموش هي و راجلها و طير فرحتها و حلمتها في دقيقة (هو بينتنا ربي يستر لا المرزوقي يخرج اللي اغتصبوها في عفو كيما عوايده) .... قداش بش نبقى نحكي على المعانات و اللي مصايب اللي هابطة على روسنا من كل جهة و تبقى حاير و تخمم و اللي يصدمك اكثر حال برشا 'مثقفين' و 'سياسيين' اللي يحكيلي على تعدد الزوجات و اللي معريتلي روحها قالك شنوا حرية و موش عارفة شنوا اخر
و اللي يزيد يندمك اكثر كي تلقى 'شلايك' المجلس التاسيسي مسيبين كل شي و يتناقشولي في مواضيع على قد مخاخهم
يخليك تقول 'اههههههه يا تونس اش تخرج شلايك' ربي يصبرنا لا اكثر لا اقل مع سكات و رقاد الشعب اللي موش عارفة في شنوا يخمم العيشية و موش عايشين علاش ساكتين برحمة والديكم اعلاش ساكتين ؟